अति विपन्न परिवारलाई कृषि एवं पशुपालनमा आकर्षित

• Kalopati

काठमाडौँ । राजधानीको गोकर्णेश्वर र कागेश्वरी मनोहरा नगरपालिकाका अति विपन्न परिवारलाई कृषि एवं पशुपालनमा आकर्षित गर्ने भैँसीका पाडारपाडी र बाख्रा वितरण गर्ने भएको छ ।

पशु सेवा कार्यालय नयाँपाटीमा आयोजित किसान अन्तरक्रियामा वाग्मती प्रदेशका पूर्वभौतिक पूर्वाधार विकास मन्त्री एवं प्रदेश सांसद रामेश्वर फुयाँलले भैँसी पालन कम हुँदै गएको अवस्थामा गोकर्णेश्वर र कागेश्वरी मनोहरा नगरपालिकालाई भैँसी पकेट क्षेत्रका रुपमा जोगाइ राख्नका लागि पाडा र पाडी वितरण कार्यक्रम महत्वपूर्ण हुने बताए ।

वाग्मती प्रदेश सरकारले काठमाडौँ निर्वाचन क्षेत्र नम्बर ३ प्रदेशसभा ‘ख’ का गोकर्णेश्वर र कागेश्वरी मनोहरा नगरपालिकाका अति विपन्न किसान परिवारलाई पाडा÷पाडी र बाख्रा अनुदानमा उपलब्ध गराउन रु ५० लाख विनियोजन गरेको सांसद फुयाँलले जानकारी दिए । स्थानीय जनप्रतिनिधिले कृषि र पर्यटनमार्फत उत्पादन एवं रोजगारी वृद्धि गर्न अभियान चलाउने प्रतिबद्धता व्यक्त गरे ।

पहिलो चरणमा गोकर्णेश्वर नगरपालिकाका वडा न। १, २, ३, ४, ६, ७ र ८ तथा कागेश्वरी मनोहरा नगरपालिकाका १, २ र ३ वडाका अति विपन्न किसान परिवारलाई ९० प्रतिशतसम्म अनुदानमा पाडा÷पाडी र बाख्रा वितरण गरिने भेटेरिनरी अस्पताल तथा पशुसेवा विज्ञ केन्द्र ललितपुरका वरिष्ठ पशु चिकित्सक डा। गौरीमान श्रेष्ठले जानकारी दिए ।

यसका लागि किसानले समूह गठन गरी वडा कार्यालयमा दर्ता गर्नुपर्छ । सम्बन्धित वडा कार्यालयले अति विपन्न कृषक भनी गरेको सिफारिसका आधारमा पाडा र पाडी र बाख्रा वितरण गरिने उनले बताए । कृषि तथा वनविज्ञान विश्वविद्यालय रामपुर, कृषि तथा पशुपक्षी विकास मन्त्रालय, एशियन बफेलो एशोसियशन र इन्टरनेशनल बफेलो फेडेरेशनको आयोजनामा कात्तिक ८ देखि १२ गतेसम्म भर्चुअल रुपमा भएको एशियन भैँसी विज्ञको सम्मेलनमा १७ देशका भैँसी विज्ञले ७ विधामा १३५ बढी कार्यपत्र प्रस्तुत गरेका थिए ।

दशौँ एशियन बफेलो कंग्रेस आयोजक समितिका अध्यक्ष प्रा डा भूमिनन्दन देवकोटाले नेपालमा दूग्ध उत्पादनमा भैँसीले करिब ६५ प्रतिशत र मासु उत्पादनमा ५५ प्रतिशत हिस्सा ओगटेको जानकारी दिए । विश्वविद्यालयका उपकुलपति प्रा डा पुण्यप्रसाद रेग्मीले नेपाल एशियामै भैँसी उत्पादनमा चौँथोँ स्थानमा रहेको जानकारी दिए ।